alliance
By

Tuna company exec, pinakakasuhan ng estafa ng DOJ

Sharing is caring!

Pinakakasuhan na ng Department of Justice (DOJ) ng reklamong estafa sa hukuman ang ilang mga opisyal ng Alliance International Incorporated na isang kumpanya ng tuna at isang publicly listed company sa Phillipine Stock Exchange.

Sa 22-pahinang resolusyon na nilagdaan ni DOJ Undersecretary Deo Marco na may petsang March 27, 2018, tinukoy na may probable cause para kasuhan ng paglabag sa Article 315 ng Revised Penal Code ang chairman of the board ng Alliance na si George Sycip, at ang mga board of directors na sina Jonathan Dee, Alvin Dee, Joanna Dee-Laurel, Teresita Ladanga, Grace Dogillo at Arak Ratborihan.

Ang kaso ay nag-ugat sa reklamong inihain ng Harvest All Investment Limited, Victory Fund Limited at Bondeast Private Limited at Hedy Yap Chua na pawang mga dayuhang shareholder ng Alliance.

Ayon sa mga complainant, hinimok sila ng mga respondent para maglagak ng investment noong January 2009 sa Alliance sa halagang mahigit P75 million, mahigit $65 libo at mahigit apat na milyong piso.

Partikular umanong pinalabas ng respondent na si Jonathan Dee na kumikita ang kanilang kumpanya lalu pa’t balak nitong magpalawak pa ng negosyo.

Pero tila ginamit lamang umano ng mga respondent ang pera ng Alliance kung saan sila ay nag-invest para sagipin ang mga kumpanya ng mga Dee.

Kumbinsido ang DOJ na nagkaroon ng panlilinlang nang hindi ipaalam ng mga respondent sa mga complainant na ang Alliance ay nabuo nang dahil sa Amended Rehabilitation Plan na inaprubahan ng korte para mabayaran nito ang mga pinagkakautangan ng First Dominion Group of Companies o Dee Companies.

Makibahagi: Ano ang masasabi mo sa balita na ito?