114

Nov 4, 2017 @ 15:23

Transparency sa contraceptives, siniguro ng FDA

Inalmahan ng Food and Drug Administration (FDA) ang pagkuwestiyon ng Alliance for the Family Philippines, Inc. (AFLI) sa proseso ng ahensya kaugnay sa recertification ng mga contraceptive.

Sa isang pahayag, nanindigan si FDA Director-General Nela Charade Puno, na ang proseso ay bukas at transparent.

Ang ALFI ang naghain ng petisyon sa Korte Suprema kaya pansamantalang napigil ang pamamahagi ng mga contraceptive na Implanon at Implanon NXT.

Ayon kay Puno, nababahala siya na ang negatibong pagpuna sa review process ng FDA ay makahadlang sa proseso at makapagpapaantala sa pagpapatupad ng Reproductive Health (RH) Law.

“The process is technical and scientific in nature and not a political one… As scientists, we work with empirical evidence and we make sure that our conclusions are based on facts and not on hysteria,” paliwanag ni Puno.

Kasabay nito, nanawagan din ang FDA sa iba’t ibang grupo na sangkot sa isyu ng reevaluation at recertification ng mga contraceptive na maging kalmado at hayaang maging produktibo ang dayalogo.

Nabatid na papatapos na ng FDA ang proseso ng pagbusisi sa mga contraceptive products na iniutos ng Korte Suprema.

Una nang nagpalabas ang Korte Suprema ng temporary restraining order na pumipigil sa DOH at FDA sa pag-apruba ng nakabinbing aplikasyon para sa pagpapatala, pagbili, recertification at pamamahagi ng mga contraceptive implant na pinaniniwalaang abortifacient.

Pero sakop lamang ng TRO ang produktong kinuwestiyon ng petitioner partikular na ang Implanon at Implanon NXT.

Sa website ng Implanon, ang nasabing contraceptive ay kayang pumigil ng pagbubuntis ng hanggang tatlong taon.

Ang TRO ay babawiin kapag natapos na ang summary hearing na bubusisi sa kinuwestiyong contraceptives at kapag napatunayan na hindi ito abortifacient. (Maricel Diaz)

Makibahagi: Ano ang masasabi mo sa balita na ito?