Tag: Department of Agriculture

Kinastigo ni Senadora Imee Marcos ang tila pamimilay ng Department of Agriculture (DA) sa abilidad ng gobyerno na itaas ang kinakailangang kita para makaagapay sa dobleng dagok ng African Swine Fever (ASF) at Covid-19.

Ayon kay Marcos, nagbibigay ang DA ng “kuwestiyonableng payo” kay Pangulong Duterte dahilan para lagdaan nito ang Executive Order 128 noong Miyerkoles, na nagtataas sa dami ng mga aangkating baboy at nagtatapyas sa taripa para tugunan ang kapos na supply dahil sa ASF.

“Akala ko ba naghahanap tayo ng pera? Asan ang pinagmamalaking whole-of-government approach?” tanong ni Marcos.

“Magtatapon lang tayo ng Php11.5 billion na ‘ayuda,’ bakuna, at PPE (personal protective equipment) at ikakanal ang mga lokal na magbababoy, sa isang iglap,” dagdag pa nito.

Ayon pa kay Marcos, habang sinisiguro ng DA ang iskandalosong kita para sa pork importers, iniwan naman nitong nakatiwangwang ang plano para sa mga lokal na magbababoy na dapat sana ay pinoprotektahan nila.

Aniya, kakarampot ang suporta ng DA para sa livestock industry na nilaanan ng P1.5 bilyon sa kanilang 2021 badyet, kahit noon pang 2019 nakaamba ang banta ng ASF.

Suportado ng EO ang rekomendasyon na ipinadala kamakaylan ng Ehekutibo sa Kongreso para itaas ang minimum access volume (MAV) ng aangkating baboy sa 350,000 metriko tonelada (MT), o nasa 6.5 na beses sa kasalukuyan nitong limitasyon na 54,210 MT, na may kabuuang 404,210 MT.

Ang mga taripa sa importasyon sa loob at labas ng MAV ay mababawasan mula sa 30% tungo sa 5% at 40% tungo sa 105 sa loob ng unang tatlong buwan matapos na maging epektibo ang EO, at itataas ng tig-5% sa susunod na siyam na buwan.

Ayon pa kay Marcos, chair ng Senate Committee on Economic Affairs, na isusuko ng EO 128 ang food security ng Pilipinas sa mga dayuhang producers at exporters habang mapipilitan ang mga lokal na magbababoy na magbenta ng palugi.

“Ang patataas ng importasyon ng baboy ay magbibigay ng pansamantalang remedyo sa mga konsumer pero doble ang magiging dagok nito na pangmatagalan ang negatibong epekto sa ating mga hog raiser,” sabi ni Marcos.

“Malinaw, na ang mga benepisaryo ng EO ay mga foreign producer, foreign exporter, local pork importer at maaaring maging ng mga tiwaling opisyal ng gobyerno na nagbebenta ng lisensya sa importasyon,” sambit pa nito.

“Hindi kakayanin ng mga local hog raiser ang kumpetisyon sa mga importer. Karamihan pa naman sa kanila ay backyard raisers na baka mag-desisyon na lang na magsara kaysa ibenta sa paluging presyo, kundi ay talo sila,” paliwanag ni Marcos.