115

Dec 12, 2017 @ 15:02
By

Roberto Ongpin, inabsuwelto ng CA sa ‘insider trading’ case

Inabsuwelto ng Court of Appeals (CA) ang negosyanteng si Roberto Ongpin sa administratibong pananagutan na 174 counts ng ‘insider trading’ na ipinataw laban sa kanya ng Securities and Exchange Commission (SEC).

Kaugnay nito, tinukoy ng CA former Special 13th Division na wala ring batayan ang ipinapataw na P174 milyon na multa ng SEC laban kay Ongpin.

“Wherefore, in view of all the foregoing, the Decision July 8, 2016 of respondent (SEC), finding petitioner liable for committing 174 counts of insider trading under Section 27.1 of the Securities Regulation Code is hereby Reversed and Set Aside,” ang bahagi ng 29-pahinang desisyon ng CA.

Ang kautusan ng SEC ay nag-ugat dahil sa pagkakasangkot umano ni Ongpin sa ‘insider trading’, kung saan sinasabing kumita umano siya sa bentahan ng Philex Mining shares noong Disyembre 2, 2009 gamit ang insider information.

Pero ang kautusan ng SEC ay kinuwestiyon ni Ongpin sa CA.

Ayon sa CA, walang legal na batayan ang napakalaking multa na ipinataw ng SEC laban kay Ongpin dahil lumagpas ang komisyon sa halaga ng penalty o multa na itinakda ng batas.

Nakasaad daw kasi sa ilalim ng Securities and Regulation Code na ang pinakamababang halaga ng multa ay sampung libong piso, habang ang pinakamataas na multa naman ay isang milyong piso.

Hindi rin kumbinsido ang CA na maituturing na ‘insider trading’ ang pagsisiwalat sa publiko ng nangyaring bentahan sa shares ng Philex Mining pabor sa First Pacific na tumapos sa mga espekulasyon at naging dahilan ng pagbagsak ng market price ng Philex shares.

Nang dahil sa desisyong ito ng CA, magiging permanente na ang injunction order na ipinalabas ng CA na pumigil sa SEC sa paniningil ng multa mula kay Ongpin.

Makibahagi: Ano ang masasabi mo sa balita na ito?