Matapos ang magandang ipinamalas ng National women’s team sa preliminaries, natuldukan nitong Biyernes ang karera ng koponan sa 2019 FIBA 3×3 U18 World Cup nang matalo sa quarterfinals laban sa top seed China 21-12.
Hindi tumigil ang mga Pinay sa huling tatlong minuto ng laban matapos umiskor ng tatlong sunod na puntos sina Camille Izabel Clarin at Angelica Marie Surada, 15-12.
Sa ika-77 segundo ng laban, humataw si Chinese player Zhouze He ng back-to-back two-pointers para ilayo pa ang lamang sa 19-12 laban sa Pilipinas.
Dagdag pa ang jumper shot ni Bei Liu sa labas na linya, 22.7 natitirang oras sa laban.
Nakapasok ang PH U18 sa quarterfinals dahil sa 3-1 win loss record sa Pool C sa elimination round.
Pinataob ng Team Philippines ang mga bansang Czech Republic, Mongolia at Netherlands.
Ilan pa sa bahagi ng koponan si Ella Patrice Fajardo at Karl Ann Pingol.
