30

Sep 12, 2021 @ 23:14
By

PH umangat sa kampanya vs money laundering

Binigyan ng isang regional inter-governmental body ng mas mataas na grado ang Pilipinas sa pagtugon sa pito mula sa 40 rekomendasyon nito laban sa money laundering kung saan nagkukulang ang Pilipinas kaya isinama ang bansa sa `grey list’ ng Financial Action Task Force (FATF).

Kapag nasa FATF grey list ang isang bansa o teritoryo, iniiwasan ito ng mga investor, bangko at iba pang kompanya na magkaroon ng transaksiyon dito kaysa sila pa ang madamay at sumabit sa money laundering.

Bukod sa iiwasan ng mga investor ang Pilipinas, apektado rin ang mga overseas Filipino worker (OFW) dahil mapapamahal at magiging mas mabusisi ang kanilang pagpapadala ng pera sa mga kamag-anak sa bansa.

Hiniling ng ng Pilipinas sa Asia/Pacific Group (APG) on Money Laundering na muling tingnan ang pagsunod ng bansa sa 40 rekomendasyon nito at inilabas ng APG ang bagong ratings noong Setyember 6.

Pinakamalaki ang inangat ng grado ng Pilipinas sa isyu ng pagpopondo at sa `proliferation of weapons of mass destruction’ na sakop ng Recommendation No. 7 ng FATF. Dati ay `non-compliant’ ang Pilipinas sa isyung ito ngunit inamiyendahan ang Anti-Money Laundering Law ng bansa at binigyan na nito ng pansin kaya’t tinuturing na ng APG na `largely compliant’ ang Pilipinas sa isyung ito.

Itinaas din ng APG ang grado ng Pilipinas sa `largely compliant’ pagdating sa pagkukumpiska ng mga kayamanang galing sa krimen tulad ng iligal na droga na nasa Recommendation No. 4; sa isyu ng pagpaparusa sa terorismo at terrorist financing na nasa Recommendation No. 6; ang pagsisiguro na kilala ng mga bangko at financial institution ang kanilang mga kliyente na nasa Recommendation No. 22; at iba pang mga hakbang na konektado dito na nasa Recommendation No. 23 pati na ang pagiging transparent sa pagkakakilanlan sa mga tunay na may-ari ng mga kompanya na nasa Recommendation No. 24.

Itinaas din ng APG ang grado ng Pilipinas sa financial intelligence unit na dati ay partially compliant lamang at ginawa nang compliant.

Samantala, sa kabila ng mga tumaas na grado, kulang pa rin umano ang Pilipinas pagdating sa mga sumusunod na isyu: transparency at beneficial ownership ng mga legal arrangement, pagdating sa pagbabantay sa mga bangko at mga piling negosyo tulad ng casino at iba pang mga propesyon na tinatawag nitong NDFBP o designated non-financial businesses and professions, mga cash courier at sa usapin ng extradition ng mga salarin sa krimen.

Hindi malinaw kung sapat na ang ginawa ng Pilipinas para matanggal sa grey list dahil dito.

Makibahagi: Ano ang masasabi mo sa balita na ito?