43

By

Pagbenta at distribusyon ng Dengvaxia, pinatigil ng FDA

Sharing is caring!

Ipinatigil na ng Food and Drug Administration (FDA) ang pagbebenta at pamamahagi ng kontrobersyal na bakuna kontra dengue na Dengvaxia.

Sa isang-pahinang advisory na pirmado ni FDA Director General Nela Charade Puno, inatasan nito ang Sanofi na suspendihin ang pagbebenta, distribusyon at marketing ng Dengvaxia.

Iniutos din ng FDA ang “withdrawal” o pag-aalis ng Dengvaxia sa merkado habang hinihintay ang magiging direktiba ng FDA.

“In order to protect the general public, the Food and Drug Administration (FDA) immediately directed Sanofi to SUSPEND the sale/distribution/marketing of Dengvaxia and cause the WITHDRAWAL of Dengvaxia in the market pending compliance with the directives of the FDA,” ang nakasaad sa advisory ng FDA.

Pinakikilos din ng FDA ang Sanofi para magsagawa ng “information dissemination campaign” sa pamamagitan ng advisories, “dear doctor letters”, at pagdaraos ng forum sa mga pasyente.

Mahigpit umanong nakikipag-ugnayan ang FDA sa Department of Health (DOH) para sa alinmang negatibong pangyayari o reaksyon na maiuulat ng mga nabakunahan ng Dengvaxia.

“The FDA is closely coordinating with the Department of Health (DOH) for any adverse events/reactions that may be reported by the recipients following their immunization of the Dengvaxia, and will immediately take appropriate measures to protect the public,” turan pa ng FDA sa advisory nito.

Inaabisuhan din ng FDA ang lahat ng mga botika, kasama na ang mga consumer at healthcare professional na makiisa sa post marketing surveillance ng Dengvaxia sa pamamagitan ng pag-uulat sa FDA ng alinmang insidente na magbibigay ng indikasyon na ang Dengvaxia ay naging dahilan ng pagkamatay, seryosong karamdaman o pinsala sa consumer, sa pasyente o sinumang tao. (Maricel Diaz)

Makibahagi: Ano ang masasabi mo sa balita na ito?