267

Nov 6, 2017 @ 15:15

P10-M shabu nasabat sa condo malapit sa Malacañang

Naharang ng mga operatiba ng Philippine Drug Enforcement Agency (PDEA) ang P10 milyon halaga ng shabu sa isang residential area malapit sa Malacañang.

Naaresto sa naturang operasyon ng PDEA ang isang Diane Yu Uy na natagpuan sa loob ng condominium unit sa Gen. Solano Street sa Barangay San Miguel sa Maynila.

Ang naturang lugar ay hindi kalayuan sa Ilang sa Gate 1 ng Malacañang Palace.

Nakuha mula suspek na si Uy ang dalawang kilo ng shabu na tinatayang nagkakahalaga ng P10 milyon.

Paliwanag ni PDEA Director General Aaron Aquino, isinagawa ang raid sa condominium unit base sa nakuha nilang impormasyon.

Si Uy ay sinasabing anak ng tinaguriang “drug queen” na si Yu Yuk Lai na nakakulong sa Correctional Institute for Women (CIW).

Nabatid na bago pinuntahan ng PDEA ang bahay ni Uy, sinalakay muna ng pinagsanib na pwersa ng PDEA, SWAT, PNP-LRU at BuCor ang selda ni Yu Yuk Lai alas 4:30 ng madaling araw ng Lunes.

Nasabat sa kubol ng drug queen ang 27 pantyl iners na may palamang mga shabu at samu’t saring bloke ng crystals.
Tinatayang nasa 135 na gramo ang nakuha na nakapalaman sa 27 pantyliners na ang halaga ay nasa P1 milyon, Habang may nakuha pang hiwalay na 2 kilo ng shabu na may kasamang 19 na tseke na nagkakahalaga ng P4.5M at cash na P100,000 ang nakuhasa selda ni Yu Yuk Lai.

Ayon sa PDEA, isang buwan din na isinailalim sa surveillance ang piitan bago isagawa ang pagsalakay.

Tatlong test buy pa ang naganap at nakumpirmang nabibili ang sachet ng shabu na nakapalaman sa pantyliners.

Hinala ng PDEA, si Diane Yu Uy ay operator ng kaniyang ina sa labas ng bilangguan. (Ricklove Villanueva)

Makibahagi: Ano ang masasabi mo sa balita na ito?