35

By

Kahulugan ng ‘neutralize’ at ‘negate’, hinimay sa oral argument sa war on drugs

Sharing is caring!

Bukas sa maraming interpretasyon ang mga salitang “neutralize” at “negate.”

Ito ang isa sa mga ipinunto ni Senior Associate Justice Antonio Carpio sa kanyang interpelasyon sa nagpapatuloy na oral arguments kaugnay sa war on drugs.

Ayon kay Carpio, kung pagbabatayan ang mga pahayag ni PNP Chief Director General Ronald Dela Rosa, ang “neutralize” ay maaring mangahulugan ng “surrender,” “arrested,” or “killed.”

Ang salita rin umanong “neutralization” at “negation” ay hindi na bago sa PNP dahil ito ay nagamit na sa PNP manual noong 2014.

Dahil dito, kung ang mismong PNP Command Memorandum Circular 16-2016 ang pagbabatayan na naglalaman ng mga salitang “neutralization” at “negation,” hindi masasabing “unconstitutional” ang dokumento.

Maari umanong sa implementasyon ng kautusan nagkakaroon ng paglabag sa Constitutional rights.

Sa pagtatanong naman ni Justice Marvic Leonen, tinukoy nito na nakasaad mismo sa PNP CMC 16-2016 ang utos sa mga myembro ng PNP na ang lahat ng anti-drugs operation ay dapat na tumatalima sa Bill of Rights at sa karapatan ng isang inaresto o nasa ilalim ng custodial investigation.

Hindi raw ba ito ang mismong karapatan na nais na itaguyod ng mga petitioner at ang naganap na mga patayan ay paglabag lamang ng mga pulis sa CMC 16-2016.

Pero sa panig ni Diokno, ang nasabing probisyon sa kinukwestiyong kautusan ay maituturing lamang na “lip service.”

Ang mas dapat umanong bigyang pansin sa bahagi ng PNP Circular ay ang utos na “neutralization” sa mga drug suspect, gayundin ang pagkalap ng mga impormasyon at house to house visitation na nagreresulta sa paglabag sa bill of rights.

Patuloy na naninindigan si Diokno na ang pakahulugan ng neutralize at negate ay pagpapahintulot na paslangin ang mga sangkot sa iligal na droga. (Maricel Diaz)

Makibahagi: Ano ang masasabi mo sa balita na ito?