14

Feb 19, 2021 @ 13:48
By

Imee: US dapat lang magbayad nang patas sa paggamit sa PH military bases

Kinatigan ni Senadora Imee Marcos ang paninindigan ni Pangulong Duterte na karapat-dapat lang magbayad nang patas ang U.S. sa Pilipinas dahil sa delikadong papel nito sa pagbibigay ng unang depensa sa Amerika sa Indo-Pacific region.

“Hindi lang nabibigyan ng Pilipinas ang American forces ng unang depensa sa Indo-Pacific region kundi pati paggamit nila sa tubig at kuryente sa ating mga military bases ay binabayaran din natin,” ayon kay Marcos.

“Napakaraming Pilipino ang hindi kayang magbayad sa tubig at kuryente ngayong may pandemya. Itutuloy pa rin ba ang subsidiya sa mga Amerikano?” tanong pa nito sabay banggit sa U.S. military benefits na nakasaad sa Article 7 ng Enhanced Defense Cooperation Agreement (EDCA).

Sabi ni Marcos, dapat surin muli ang EDSA dahil napapaikutan ng Amerika ang prohibisyon sa ating Konstitusyon sa mga foreign military bases sa bansa.

Aniya, ang dating bayad sa ating gobyerno bago mapaalis ang mga U.S. bases halos tatlong dekada nang nakaraan ay naiiwasan din ng Amerika.

“Kahit ang mga superpower nangangailangan din ng mga kaibigan, at ang bagong pagtingin ng Amerika sa Asia-Pacific ay nagpapatibay sa malaking ginagampanan ng ating rehiyon at ng Pilipinas,” sabi ni Marcos, bilang sagot sa batikos kay Presidente Duterte na ang paghingi ng patas na bayad ay pangingikil.

Sumang-ayon ang senadora sa Presidente na ang $3.9 bilyon na ibinabayad ng Amerika sa Pilipinas noong 2001 hanggang 2017 ay napakaliit kumpara sa $16 bilyon na ibinabayad sa Pakistan.

“Natatakot ang Amerika na kapag bumagsak ang gobyerno ng Pakistan, ang 150 nuclear warheads nito ay magagamit ng Taliban laban sa Amerika,” ayon kay Marcos.

“Kung wala ang Pilipinas, ang kalakal ng Amerika pati na ang mga pangako nito sa seguridad ng rehiyon ay hihina. Ngunit dahil sa pagtanggap natin sa U.S. forces, magiging target naman ang Pilipinas ng mga kalaban ng Amerika, kahit hindi tayo direktang kasali sa anumang gyera na maaring pumutok sa ating rehiyon,” dagdag pa nito.

Makibahagi: Ano ang masasabi mo sa balita na ito?