37
magdalo-gary-alejano
By

Igalang ang boses ng bayan

Sharing is caring!

Ang gobyerno ay inaasahang makinig at galangin ang boses ng taumbayan sa iba’t ibang mga isyu tulad na lamang ng pag-amyenda sa 1987 Constitution at pagbabago ng sistema ng gobyerno. Ang taumbayan ang nagluklok sa administrasyong Duterte sa kapangyarihan kaya anuman ang pasya ng mamamayan ay dapat igalang ng Pangulo at lahat ng mga halal na opisyal lalo na ang mga miyembro ng Senado at Kongreso.

Malinaw na malinaw sa Pulse Asia survey na walang public clamor sa pag-amyenda sa Saligang Batas at maging sa pagpalit tungo sa federal form of government na ipinipilit ng administrasyong Duterte. Sa nasabing survey, 67% sa mga tinanong ang tutol na baguhin ang Saligang Batas at 62% naman ang ayaw sa federalismo. Malinaw na walang dahilan para ipagpilitan sa ating mga kababayan ang isang bagay na tuwirang inaayawan naman nila.

Matagal nang gumagastos ang gobyerno para ibenta sa mga tao ang federal form of government at baguhin ang 1987 Constitution pero hindi pa rin ito kinagat na mga mamamayan. Nararapat lang na galangin ito ng Pangulo at kung maaari ay abandonahin na ang panukalang ito. Mas mabuting harapin ang mga problema ng ating bansa na nais din ng taumbayan na maaksyunan agad tulad ng pagtaas ng presyo ng mga bilihin at kakulangan ng trabaho.

Hindi rin maiwasan magduda sa motibo ng mga nagsusulong ng pagbabago ng Konstitusyon. Kung ngayon pa lang ay nakikita at nararamdaman na natin ang abuso sa kapangyarihan sa ilalim ng administrasyong ito, paano na lang kung mabigyan pa sila ng mas malawak at pinahabang kapangyarihan? Isa iyan sa mga kinatatakutan ng taumbayan.

Huwag naman sanang sagarin ng administrasyong Duterte ang pasensya ng mga Pilipino na sa nakaraang dalawang taon ay naging biktima ng mga mapaminsala at pahirap na polisiya nito. Lahat ay may hangganan ika nga nila at itong pagbabago ng Saligang Batas at pagsulong ng federalismo ay ang posibleng maging mitsa para magising na ang taumbayan.

Matindi na ngayon ang hinaing ng marami dahil sa Tax Reform Acceleration and Inclusion (TRAIN) Law, pagpatay sa mga mahihirap sa ilalim ng war on drugs, hindi paggalang sa rule of law, pati pagmumura sa Diyos at tila pagsuko sa China ng ating mga teritoryo. Huwag namang paabutin pa ng administrasyon na tuluyang sumabog ang ngitngit ng mga mamamayan sa gobyerno. Nawa’y matutunan ng administrasyong Duterte na pakinggan at igalang ang pasya ng taumbayan.

Makibahagi: Ano ang masasabi mo sa balita na ito?