32

Nov 17, 2021 @ 14:25

FDA ginawaran EUA bakuna ng India

Binigyan na ng emergency use authorization (EUA) ng Food and Drug Administration (FDA) ang COVID vaccine na gawa ng Serum Institute of India.

Ito ang inanunsyo ni FDA Director General Dr. Eric Domingo sa Laging Handa press briefing.

Ayon kay Domingo, ang bagong vaccine ay kilala sa brand na Covovax o sa Amerika ay Novovax at aprubadong gamitin sa mga indibidwal na edad 18 pataas.

Ibinibigay aniya ang Covovax sa dalawang dose at nakita sa clinical trial na mild lamang ang adverse effect ng bakuna at 89.7% ang efficacy rate o ang bisa nito.

“Ito yung tinatawag nating SARS-Cov2 protein nano particle vaccine. Bagong klase ng bakuna ito, ito ay tinatawag na protein sub-unit vaccine na pure part of the antigenic na parte ng virus ang kanyang nire-replicate pagkatapos ito ang ini-inject para mag-illicit ng immune response,” ani Domingo.

Posibleng magamit sa bansa ang nabanggit na bakuna sa katapusan ng taon o sa 2022.

Ang Serum Institute of India ang pinaka-malaking vaccine manufacturer sa buong mundo at nabisita na ni Vaccine Czar Secretary Carlito Galvez noong kasagsagan ng pananalasa ng Delta Covid variant sa India. (Aileen Taliping)

Makibahagi: Ano ang masasabi mo sa balita na ito?