331

Jan 28, 2021 @ 19:39
By

Bato: Utak sa pagbasura ng kasong administratibo vs Nuezca ‘balatan’

Kinalampag ni Senador Ronald “Bato” dela Rosa si Philippine National Police (PNP) chief Debold Sinas na imbestigahan ang mga opisyal na sangkot sa pagbasura ng kasong administratibo laban sa na-dismiss na sa serbisyong si Senior Master Sergeant Jonel Nuezca, ang pulis na pumatay sa mag-ina sa Paniqui, Tarlac noong Disyembre 2020.

Sabi ni Dela Rosa, chairman ng Senate committee on public order and dangerous drug, nais niyang malaman kung sino ang naglagay ng “less grave’ sa kaso ni Nuezca matapos na hindi sumailalim sa mandatory drug testing at umalis sa testing area na walang permiso o clearance noong 2014.

Kinumpirma naman ni Sinas na may nagbago na classification ng offense ni Nuesca na kinasuhan noong Abril 2014 dahil sa pagtangging sumailalim sa mandatory drug test.

“Kaya nga, puwede bang maklaro yan? Sino nagbago sa classification ng offense na ‘yan? Dahil ang alam ko dun merong na-dismiss na pulis dahil diyan,” sabi ni Dela Rosa.

Duda pa nito, posibleng konektado sa “ninja cops” si Nuezca kaya tumanggi ito sa drug test.

“Bakit nagbago yan? Sino nagbago sa classification ng offense na yan eh baka konektado yan sa mga ninja cop,” ayon pa sa dating PNP chief.

Pinayuhan pa ni Dela Rosa si Sinas na seryosohin ang anti-drug war ng adminsitrasyon sa pamamagitan na rin ng paglinis sa hanay ng kapulisan na sangkot diumano sa iligal na kalakalan sa droga.

“Debold, I would like to advise you, para maramdaman talaga ng taumbayan na we are very serious about our anti-drug campaign, tingnan mo yung mga pulis na lumalaya,” sabi ni Dela Rosa.

“Kasi positive talaga yan, siguradong user yan pag umiiwas. Kaya dapat talaga dismissed kaagad yan pag mga ganyang offenses,” sambit pa nito.

Makibahagi: Ano ang masasabi mo sa balita na ito?