18

Oct 14, 2020 @ 15:47
By

Bagyong Ofel nag-ikatlong landfall sa Masbate

Napanatili ng Tropical Depression Ofel ang lakas nito nang mag-ikatlong landfall sa Masbate nitong Miyerkoles.

Batay sa 2 p.m. weather bulletin, sinabi ng Philippine Atmospheric, Geophysical, and Astronomical Services Administration (Pagasa) na nag-landfall sa ikatlong pagkakataon si “Ofel” sa Burias Island bandang alas-12:00 ng tanghali.

Unang nag-landfall si “Ofel” sa Can-avid, Eastern Samar alas-2:30 ng madaling-araw, Miyerkoles, sumunod sa Matnog, Sorsogon ng alas-6:00 ng umaga.

Huling namataan si “Ofel” sa kanluran ng Juban, Sorsogon.

Taglay niya ang lakas ng hangin na 45 kilometro kada oras at pagbugsong 55 kph, at gumagalaw sa bilis na 10 kph.

Samantala, nananatiling nakataas ang Signal No. 1 sa Batangas; Luisiana, Majayjay, Liliw, Nagcarlan, Rizal, San Pablo City, Calauan, Alaminos, Los Baños, Bay at Magdalena sa Laguna; Guinayangan, Tagkawayan, Buenavista, San Narciso, San Andres, Mulanay, San Francisco, Catanauan, Lopez, Calauag, Quezon, Alabat, Perez, Atimonan, Tayabas City, Mauban, Sampaloc, Lucban, Gumaca, General Luna, Macalelon, Pitogo, Unisan, Plaridel, Padre Burgos, Agdangan, Pagbilao, Lucena City, Sariaya, Candelaria, Dolores, Tiaong at San Antonio sa Quezon.

Gayundin sa Calamian Islands, Occidental Mindoro, Oriental Mindoro, Marinduque, Romblon, Camarines Norte, Camarines Sur, Catanduanes, Albay, Sorsogon at Masbate.

Inaasahang lalabas sa Philippine Area of Responsibility ang bagyo, umaga o hapon sa Biyernes.

Makibahagi: Ano ang masasabi mo sa balita na ito?