By

8 ka sakop sa BIFF patay sa managlahi nga engkuwentro sa Maguindanao

Sharing is caring!

Patay ang walo ka sakop sa Bangsamoro Islamic Freedom Fighters (BIFF) sa managlahing military operations sa Maguindanao.

Matud ni 6th Infantry Division Commander Brig. Gen. Cirilito Sobejana nga ang una nga grupo sa mga namatay mga sakop ni Commander King Metin, ang Bungos Faction sa BIFF sa Maguindanao.

Matud niya nga namatay kini human sa 35 minutos nga engkuwentro sa mga sakop sa 57th Infantry Battalion sa Brgy. Meta, Datu Unsay, Maguindanao.

Duha sa limang bandido ang napatay ug narekober sa military ang mga patay nga lawas niini.

Ang dugang namatay giila nga nga silang Turman Aber ug Mansor Mohammad samtang gidala sa ilang mga kauban ang tulo nga namatay nga silang Yaser Yusop, Mutin Talib ug us a ka Mamalu ug gilubong kini sa Sitio Lab, Brgy. Kuloy, Shariff Aguak.

Nakuha usab sa military sa dapit nahitaboan sa engkuwentro ang M16 rifle, M653 rifle, M203 grenade launcher, magazines ug mga ammunitions.

Samtang nagbinirahay usab ang tropa sa 34th Infantry Battalion ug mga armadong grupo sa Sitio Macantal, Brgy. Olandang, Midsayap, North Cotabato.

Matud ni Sobejana nga samtang naniid ang mga sundalo sa panimalay ni Mando Mamalupong, alyas DM, usa sa BIFF sub commander, dihang gipamusil kini sa mga armadong kalalakihan.

Mibawos usab og pabuto ang mga sundalo nga miresulta sa pagkamatay tulo ka tawo.

Giila kini nga silang Norman Kanapia, sakop sa BIFF; Pinidiza Tumagantan, ugangan ni Commander DM ug logistic provider sa BIFF; ug Aida Dalgan, supporter ug igsoon sa asawa ni Commander DM.

Naangol usab silang Abad Tumagantang ug Rashid Dalgan Tumagantang, mga miyembro sa BIFF.

Nakuha sa militar sa dapit nahitaboan sa engkuwentro ang 1 M16 rifle, 3 hand grenades, 1 IED, 1 binocular, 1 kalibre .45 pistol, 3 cell phones, 1 tablet, ug nagkalain laing magazines ug mga bala.

Makibahagi: Ano ang masasabi mo sa balita na ito?