Hindi pinalampas ni Rosmar Tan ang mga post nina Daryl Ong at Wacky Kiray tungkol sa isa umanong job offer na P500 para sa walong oras na pagkanta.
Sa isang social media post, nagbiro si Daryl na handa niyang tanggapin ang naturang offer kung magiging $500 kada kanta ang bayad, at baka raw tatlong oras pa lang ay magsawa na ang mga nagpapa-entertain sa kanila.
Sumagot naman si Wacky sa naturang post at nagbiro tungkol sa P500 at walong oras na pagkanta, kasabay ng kanyang sariling nakakatawang komento tungkol sa mga maaaring gawin sa kanyang bahay. Sabi niya, magbigay daw sya ng P2,500 para shampoohin ang ulo niya.
Pero tila hindi nakalusot sa mata ni Rosmar ang mga banat ng dalawa.
Sa kanyang social media post, binanatan ni Rosmar ang usapin ng likes at followers at ipinakita ang pagkakaiba ng engagement sa kanilang mga post.
“Grabe 500k followers pero nag-post ang like wala pang 100 tapos nung ako yung content naka-25k likes agad,” bahagi ng post ni Rosmar.
May isa pa siyang post kung saan binanggit niya ang 2.5 million likes at 21,000 likers, bago direktang tinawag si Daryl na “master.”
Binanggit din ni Rosmar ang dating pagkanta ni Daryl para sa kanya sa isang feature sa ASAP at nagkomento tungkol sa umano’y pag-alis nito sa ABS-CBN—isang pahayag na mula mismo sa social media post ni Rosmar.
Sa huli, naging palitan ng biruan at patutsada sa social media ang usapin na mabilis namang umani ng reaksyon mula sa kanilang mga followers. (Rodel Fernando)
