Itinanggi ng House prosecution panel na namba-bluff ito sa ginagawang pagpapatawag ng mga testigo sa impeachment trial ni Vice President Sara Duterte na kalaunan ay inaalis ang ilan sa kanilang lineup.
Sinabi ni House lead prosecutor at Batangas Rep. Gerville Luistro na patuloy na sinusuri ng prosecution panel ang listahan ng mga testigo batay sa mga ebidensiyang naiharap na at tinutukoy kung kailangan pa ng karagdagang testimonya para mapalakas ang kaso.
“It is not true. Ever since, since day one, ang palaging sinasabi natin ay we have a practice of revisiting the list of witnesses,” sabi ni Luistro sa isang press conference noong Huwebes.
“We have a practice of deciding every after one witness na cover ba o hindi. Do we proceed with this witness? It is a continuing process, and it is not simply about withdrawing,” dagdag pa nito.
Ginawa ni Luistro ang pahayag matapos sabihin ng prosekusyon sa Senate impeachment court na hindi na nito ihaharap sa witness stand si dating Sen. Antonio Trillanes IV.
Nauna rito, hindi na rin iniharap ng prosekusyon ang ilan sa mga inilitsa nitong testigo kabilang si Office of the Vice President chief of staff Zuleika Lopez.
Sinabi ni Luistro na ang mga desisyong alisin ang mga testigo ay ginagawa matapos timbangin at suriin ng prosekusyon ang nailatag na nitong ebidensya.
“There are considerations, of course, in the decision of the prosecution to withdraw or dispense with the presentation of some witnesses,” dagdag pa ni Luistro. (Billy Begas)
