Inaprubahan ng Budget Amendments Review Subcommittee (BARSc) ng House Committee on Appropriations ang karagdagang P50 milyon sa confidential funds ng National Bureau of Investigation (NBI).
Sa deliberasyon nitong Huwebes ng gabi, sinabi ni House Deputy Speaker at Iloilo Rep. Janette Garin na ang panukalang budget ng NBI para sa 2027 ay nasa P2.9 bilyon, mas mababa kumpara sa P3.7 bilyong alokasyon nito ngayong taon.
“They have been tasked with a lot of work recently. Not to mention the fact that they have a lot of challenges in terms of the impact, the negative side of social media,” sabi ng lady solon.
“And that we have been seeing the influence of social media in terms of scams, in terms of terrorism, illegal gambling, and other illegal activities,” dagdag pa ni Garin.
May inilaang P175.4 milyong confidential funds sa NBI sa ilalim ng 2027 National Expenditure Program. Mas mababa ito kumpara sa P300.4 milyong alokasyon nito ngayong taon.
Iminungkahi ni Garin na dagdagan ng P50 milyon ang confidential funds ng NBI.
Sinuportahan ang mosyon at inaprubahan ito ni Bataan Rep. Albert Garcia, ang presiding officer ng deliberasyon, matapos na walang tumutol na miyembro. (Billy Begas)
