Inaprubahan ng Budget Amendments Review Subcommittee (BARSc) ng House Committee on Appropriations ang P150 milyong alokasyon para sa pagtatayo ng mga cable car at tram system para sa paghahatid ng mga pananim.
Sa deliberasyon nitong Huwebes ng gabi, sinabi ni House Committee on Agriculture and Food chairperson at Quezon Rep. Mark Enverga na humiling ang Department of Agriculture (DA) ng karagdagang pondo para sa mga programa nito.
Sinabi ni Enverga na isa sa mga kahilingan ay ang pondo para sa Agri Transport and Support Infrastructure project.
“To be more definitive about this program, Madam Chair, this would be the cable car systems which would be much cheaper for high value crops being planted in the mountainous areas,” sinabi ni Enverga kay House Committee on Appropriations chairperson at Nueva Ecija Rep. Mikaela Suansing.
“Rather than building costly farm-to-market roads, these would be trams na that would transport goods from one mountain to another, which would be much cheaper and more economical for our production system in high-value crops,” dagdag niya.
Sinabi ni Enverga na walang pondo para sa nasabing programa sa ilalim ng 2027 National Expenditure Program (NEP).
Inaprubahan ni Suansing ang mosyon ni Enverga na maglaan ng P150 milyon para sa pagtatayo ng mga cable car at tram system matapos walang tumutol.
Sa ilalim ng DA, inaprubahan din ng BARSc ang karagdagang P500 milyon para sa Expanded Fertilizer Assistance, P125 milyon para sa Solar Pumps for Irrigation, P105 milyon para sa hybrid solar-powered ice plants, P4.9 bilyon para sa farm-to-market roads, P500 milyon para sa pagtatayo, rehabilitasyon at pagpapahusay ng mga fish port, P100 milyon para sa high-value crops, at P10 bilyon para sa Presidential Assistance to farmers and fisherfolk.
Inaprubahan ng BARSc ang kabuuang P16.44 bilyong realignment para sa budget ng DA para sa 2027. (Billy Begas)
