Inaprubahan ng Budget Amendments Review Subcommittee (BARSc) ng House Committee on Appropriations ang dagdag na P8.07 bilyon sa budget ng education sector para sa 2027.
Sa ilalim ng Department of Education (DepEd), inaprubahan ng BARSc ang karagdagang P500 milyon para sa School Safety and Security, P50 milyon para sa Madrasah Education Program, P75 milyon para sa Special Needs Education Program, P25 milyon para sa Indigenous People Education Program, P350 milyon para sa Academic Recovery and Accessible Learning (ARAL) Program, at P952 milyon para sa Basic Education Facilities Fund.
Umabot sa P1.952 bilyon ang kabuuang realignment na inaprubahan ng BARSc para sa basic education.
Sa ilalim naman ng Commission on Higher Education (CHED), inaprubahan ng BARSc ang karagdagang P2.102 bilyon para sa Tertiary Education Subsidy, at P1.766 bilyon para sa Tulong Dunong Program.
Inaprubahan din ng BARSc ang karagdagang pondo para sa University of the Philippines (UP) System, kabilang ang P70 milyon para sa UP Center for Education and Development, P275 milyon para sa Resilience Institute’s conduct of research services sa ilalim ng Project NOAH, at P15 milyon para sa UP Diliman Institute of Mathematics.
Dadagdagan ng P456 milyon ang budget para sa Locally Funded Projects sa iba’t ibang State Universities and Colleges (SUCs).
“So for Higher Education, a total of P4.68 billion on top of the P1.95 billion for basic education,” sabi ni House Committee on Appropriations chairperson at Nueva Ecija Rep. Mikaela Angela Suansing, na nanguna sa deliberasyon.
Para naman sa Technical Education and Skills Development Authority (TESDA), inaprubahan ng BARSc ang P966.6 milyon para sa Training for Work Scholarship Program, at P469.2 milyon para sa Special Training for Employment Program, na may kabuuang P1.44 bilyon.
Sinabi ni Suansing na umabot sa P8.072 bilyon ang iminungkahing realignment para sa education cluster.
“So we finished our first cluster, which is the education cluster, and we have added P8.072 billion,” sabi ni Suansing.
“With that po, we adhere to our commitment. Again, we have repeatedly said that on the part of the House of Representatives, we want to make sure that the education cluster gets the biggest budgetary share in our budget,” dagdag pa ni Suansing. (Billy Begas)
