Matagumpay na napaalis ng Philippine Coast Guard (PCG) ang isang Chinese research ship na namataan sa karagatan malapit sa Itbayat, Batanes matapos ang tuloy-tuloy na pagbabantay ng PCG nitong Huwebes, Oktubre 1.
Ayon kay PCG Spokesman for the West Philippine Sea Rear Adm. Jay Tarriela, patuloy na mino-monitor ng BRP Teresa Magbanua ang naturang barko hanggang sa tuluyan itong makalabas sa exclusive economic zone (EEZ) ng Pilipinas.
Dagdag niya, umalis ang Jia Hai Ke 7 sa lugar bandang tanghali at tumungo pahilaga, kasama ang barkong 2503 ng China Coast Guard.
Kinilala ang barko bilang Jia Hai Ke 7, na unang namataan ng PCG na nasa humigit-kumulang 38 nautical miles northwest ng Itbayat noong Setyembre 28.
Ayon sa PCG, nanatili ito sa lugar at nagsasagawa ng illegal marine scientific research. (IS)
