Nagpahayag ng pagkadismaya at pagkainis ang filmmaker na si Joey Reyes matapos bawiin ng Department of Trade and Industry (DTI) ang naunang inaprubahang business-class privilege para sa kanyang biyahe sa San Sebastian International Film Festival sa Spain.
Sa kanyang Facebook post noong September 16, tila may pahiwatig si Film Development Council of the Philippines Chairman at CEO Reyes sa umano’y kanyang “one of the worst days of my life.”
Aniya, labis siyang nadismaya sa dahil sa isang memo at mistulang nabalewala umano ang mga pagsisikap na ginawa niya para matupad ang kanyang mga tungkulin.
“After all the hard work, all it took was the stroke of a memo to disavow all the sacrifice invested to fulfill what was required and to deliver credible results,” pahayag ni Reyes.
“But that is bureaucracy and despite all these decades of human experience, I am still a neophyte in the domain of government. I was infuriated. Frustrated. Insulted,” dagdag pa niya.
Ayon sa impormante ng Abante, nag-ugat ang reklamo ni Reyes dahil sa polisiyang umiiral para sa mga opisyal ng gobyerno kaugnay ng pagbiyahe.
Batay umano sa memorandum na may petsang Setyembre 11 na ipinadala kay Reyes, sinabi ng DTI na naaprubahan muna ng Office of the President ang business-class airfare para sa biyahe ni Reyes noong Setyembre 19 hanggang 24.
Ngunit kalaunan ay iniutos ng Office of the Deputy Executive Secretary for General Administration (ODESGA) ang muling pagsusuri sa travel arrangements.
Matapos ang review, sinabi ng DTI na dapat bawiin ang business-class privilege alinsunod sa mga umiiral na government rules and regulations sa official travel.
