Kumpiyansa si House prosecution panel spokesperson at Lanao del Sur Rep. Zia Alonto Adiong na magtutuloy-tuloy na ang pag-usad ng impeachment trial ni Vice President Sara Duterte matapos na ibasura ng Korte Suprema ang tatlong petisyon na kumukuwestiyon sa interpretasyon ng Senate impeachment court sa conviction threshold.
“The Supreme Court dismissed the three separate petitions on technical grounds, including prematurity and lack of legal standing,” sabi ng mambabatas.
“We welcome the ruling. It allows the trial to proceed without delay and keeps the focus where it belongs—on the evidence already before the Senate Impeachment Court,” dagdag pa ni Alonto Adiong.
Ibinasura ng SC en banc ang mga petisyong inihain nina dating Executive Secretary Vic Rodriguez, Berteni Causing, at Atty. Ernesto Francisco Jr. sa procedural grounds, kabilang ang kawalan ng standing at prematurity.
Iginiit ni Alonto Adiong na malinaw na ang trabaho ng House prosecution panel ay magpresinta ng ebidensya at testigo upang patunayan ang inihain nitong Articles of Impeachment samantalang ang mandato ng Impeachment Court ay tukuyin kung dapat pang manatili sa puwesto ang isang impeachable officer.
Nakumpleto na ng prosecution panel ang paglalahad ng ebidensya sa umano’y grave threats at maling paggamit ng confidential funds. Kasalukuyan nitong inilalahad ang ebidensya sa umano’y unexplained wealth na naipon ni Duterte at ng kanyang asawang si Atty. Manases Carpio. (Billy Begas)
