Natuklasan ng Commission on Audit (COA) ang 58 unverified beneficiaries sa voucher program para sa school year 2025-2026 ng Department of Education (DepEd), na umano’y nagresulta sa P938,000 overpayment sa government assistance.
Batay ito sa COA report kaugnay ng voucher program beneficiaries sa ilalim ng Government Assistance to Students and Teachers in Private Education (GASTPE) para sa mga senior high school student, na inilabas noong Setyembre 23
Sa compliance report, kabuuang 5,507 benepisyaryo ang sinuri ng COA mula sa 571 senior high school, ngunit 58 ang hindi maberipika.
Paliwanag ng ahensya, “32 had officially or unofficially dropped out, 12 transferred to other schools, 11 were not enrolled in the second semester, two were reported deceased and one was absent during school validation with no records available.”
Ayon sa COA, nakapaglabas na ng bayad sa mga eskuwelahan para sa 53 sa mga hindi naberipikang benepisyaryo.
Samantala, ipinunto naman nito na kailangang i-refund ng mga participating school ang anumang sobrang natanggap na subsidy, batay sa Department Order No. 20, series of 2023.
Sa buong bansa, may 172,909 benepisyaryo ang GASTPE voucher program para sa nasabing school year, hindi kabilang ang BARMM at Negros Island Region. (AM)
