Inilabas na ng PASADO o Pampelikulang Samahan ng mga Dalubguro ang mga nominado para sa ika-28 edisyon ng Gawad PASADO 2026.
Muling magiging tahanan ng Gawad PASADO ang San Beda University–Manila. Nagpasalamat ang PASADO sa Bedan Community sa mainit na pagtanggap at suporta para sa 28th Gawad PASADO, kung saan muling bibigyang-pugay ang mga natatanging pelikula at mga alagad ng pelikulang Pilipino.
Pinakahihintay ng marami ang mga nominado sa tatlong major categories na PinakaPASADOnG Aktres, PinakaPASADOnG Aktor at PinakaPASADOnG Pelikula ng Taon.
Walong pelikula ang nominado para sa PinakaPASADOnG Pelikula ng Taon. Kabilang dito ang “Call Me Mother,” mula sa Star Cinema, The IdeaFirst Company at Viva Films; “Fatherland,” mula sa BenTria Productions at Heaven’s Best Entertainment; “Madawag,” mula sa New Sunrise Films; “Meet, Greet and Bye,” mula sa Star Cinema; “Quezon,” mula sa TBA Studios; “Sunshine,” mula sa Project 8 Projects, Antipodean Studios, Happy Infinite Productions at Cloudy Duck Pictures; “The Delivery Rider,” mula sa Studio Three Sixty; at “Unconditional,” mula sa BR Film Productions.
Sa PinakaPASADOnG Aktres category, kabilang sa mga nominado sina Eugene Domingo at Barbie Forteza para sa “Kontrabida Academy,” Jennica Garcia para sa “The Delivery Rider,” Karylle para sa “Quezon,” Nadine Lustre para sa “Call Me Mother,” Maris Racal para sa “Sunshine,” Charo Santos-Concio para sa “Only We Know,” at Maricel Soriano para sa “Meet, Greet and Bye.”
Samantala, lima naman ang nominado sa PinakaPASADOnG Aktor category. Kabilang dito sina Will Ashley para sa “Love You So Bad,” Dingdong Dantes para sa “Only We Know,” Joshua Garcia para sa “Meet, Greet and Bye,” Baron Geisler para sa “The Delivery Rider,” at Jericho Rosales para sa “Quezon.”
Hindi na kasama sa listahan ng nominees ang magaling na aktor na si Allen Dizon dahil naabot na niya ang rekognisyon bilang “Dambana ng Kahusayan sa Pagganap,” o Hall of Famer, matapos niyang makamit ang anim na Best Actor awards sa Gawad PASADO.
Kabilang sa mga pelikulang nagbigay kay Dizon ng Best Actor honors ang “Lauriana,” sa direksyon ni Mel Chionglo; “Magkakabaung,” sa direksyon ni Jason Paul Laxamana; “Iadya Mo Kami,” sa direksyon ni Mel Chionglo; “Bomba,” sa direksyon ni Ralston Jover; “Mindanao,” sa direksyon ni Brillante Mendoza; at “Alpha: The Right to Kill,” na idinirek din ni Brillante Mendoza.
Dahil dito, hindi na siya kuwalipikado para muling ma-nominate o manalo sa naturang Best Actor category ng Gawad PASADO.
Bukod kay Dizon, kabilang din sa mga kinilalang Hall of Famer o ginawaran ng “Dambana ng Kahusayan sa Pagganap” sina National Artist Nora Aunor at Star for All Seasons Vilma Santos.
Muling magiging tampok sa 28th Gawad PASADO ang pagkilala sa mga natatanging pelikula, aktor at aktres na patuloy na nagbibigay ng ambag sa pagpapalago at pagpapahalaga sa pelikulang Pilipino. (Rodel Fernando)
