Iimbitahan ng National Bureau of Investigation (NBI) sina Vice President Sara Duterte at Davao City Rep. Paolo Duterte upang hingan ng komento kaugnay ng alegasyon ni dating Police Patrolman Rodulfo Gracioso Jr. tungkol sa umano’y cash delivery.
Ayon kay NBI Director Melvin Matibag nitong Lunes, iimbitahan din ng ahensya sina dating House Speaker Lord Allan Velasco at ang kanyang misis.
“Part of the investigation is also to invite the personalities mentioned in the affidavit. It should not be a subpoena but it should be an invitation, especially to the Vice President,” ani Matibag sa isang ambush interview.
“Sinasabi niya hindi niya kilala ’yung tao at gusto niya mag-kaso. Magbigay kami ng kopya ng affidavits. Just to tell you, ang affidavit po hindi pag-aari ng NBI ‘yan… we’ll ask the consent that we will release it. So ’yung mga pictures ipapakita rin natin, ibibigay natin kay Vice President para siya na mismo magsabi,” dagdag niya.
Nauna nang sinabi ni Gracioso na nag-deliver siya ng mga maletang may lamang pera kina VP Sara, dating Pangulong Rodrigo Duterte at Paolo Duterte, batay umano sa utos ni Velasco. (AC)
