Hindi umano maaaring sabihin ng mga hindi natuwa sa desisyon ng impeachment court, na ibaba ang voting threshold sa impeachment trial ni Vice President Sara Duterte, na walang umiral na due process.
Sa press conference nitong Huwebes sa Kamara, pinasalamatan ni lead prosecutor at Batangas Rep. Gerville Luistro ang Impeachment Court dahil pinairal ang due process bago dinesyunan ang nasabing isyu noong Miyerkoles.
“We would like to commend the Honorable Impeachment Court for exercising all the necessary due process, caution in addressing the question on threshold vote,” ani Luistro.
“Nakita nyo naman, nag-imbita muna sila ng Amici Curiae upang pakinggan ang kanilang knowledge, wisdom and expertise on the threshold vote,” dagdag pa ng mambabatas.
Binigyan din aniya ng impeachment court ang prosecution at depensa sa pamamagitan nina prosecutor at Akbayan party-list Rep. Chel Diokno at Atty. Michael Poa ng pagkakataon na ipaliwanag ang kani-kanilang posisyon sa nasabing usapin.
Matapos aniya nito, pinagdiskusyunan aniya ng mga Senator-Judges ang nasabing usapin bago nagbotohan kung saan 13 ang bumoto na ibase ang threshold sa aktuwal na bilang ng mga regular na dumadalo sa impeachment trial, isa ang kumontra at 6 ang hindi bumoto.
Kabilang sa 13 ay si Sen. Mark Villar habang ang bumoto ng No si presiding officer Francis “Chiz” Escudero samantalang ang 6 na hindi bumoto ay sina Senate Minority Leader Alan Peter Cayetano, Sens, Pia Cayetano, Imee Marcos, Camille Villar, Bong Go at Robinhood Padilla.
“So, I believe that the Honorable Impeachment Court exhausted all the necessary due process, all the necessary caution before they arrive at the proper interpretation of threshold vote,” paliwanag pa ni Luistro. (Bernard Taguinod)
