Premature umano ang pagkuwestiyon ngayon sa Korte Suprema ng naging ruling ng Senate impeachment court kung saan ibabatay ang two-thirds vote na kailangan upang ma-convict si Vice President Sara Duterte.
Ayon kay House lead prosecutor at Batangas Rep. Gerville Luistro, dapat din ay i-convict ng Senate impeachment court si Duterte ng mas konti sa 16 na boto.
“For it to become a proper subject matter of a petition for certiorari in the Supreme Court, dapat justiciable na, hinog na, ripe na iyong question,” sabi ni Luistro sa isang press conference nitong Huwebes. “The test is: May actual injury na ba na masu-sustain ang petitioner?”
Sinabi ni Luistro na mangyayari lamang ang “actual injury” matapos bumoto ang Senate impeachment court at i-convict nito si Duterte sa boto na mas mababa sa 16.
“We believe that this actual injury will be sustained only when the vote will be cast first,” sabi ng lady solon.
Nilinaw naman ni Luistro na malaya ang kampo ni Duterte o ang kanyang mga kaalyado na gamitin ang anumang legal na remedyo na available sa kanila.
“Karapatan po ng bawat Pilipino to avail of the remedies available, especially in the Supreme Court,” sabi ni Luistro. “No one can stop them, and even the prosecution should not stop them.”
Noong Miyerkules, bumoto ang Senate impeachment court ng 13–1, at hindi lumahok ang anim na senator-judges, upang bigyang-kahulugan ang “all the Members of the Senate” bilang mga senador na legal at aktuwal na may kakayahang lumahok sa oras ng paghatol.
Pinalitan nito ang naunang ruling na kailangan ng 16 na boto o two-thirds ng lahat ng 24 senador para ma-convict si Duterte.
Sinabi rin ni House prosecutor at Bicol Saro party-list Rep. Terry Ridon na maaaring magtungo sa SC ang kampo ng Bise Presidente kung kanilang gugustuhin.
“Her allies would want to go to the Supreme Court like what they did before. They’re free to go there,” sabi ni Ridon. “We will wait for that petition. Kung ano man ang maging pasya ng Supreme Court, tatalima lang po kami.” (Billy Begas)
