Inendorso ni dating Vice President at Naga City Mayor Leni Robredo si Senior Associate Justice Marvic Leonen bilang susunod na chief justice ng Korte Suprema.
Sa liham na may petsang Setyembre 11 at ipinadala kay Pangulong Ferdinand Marcos Jr., ninomina at inendorso ni Robredo si Leonen, na aniya’y “most senior” sa lahat ng mahistrado ng Korte Suprema.
“He has proven to be way beyond the constitutional requirements of competence, independence, probity, and integrity,” saad sa liham.
Binigyang-diin din ng alkalde ang halos 14 taong serbisyo ni Leonen sa Korte Suprema mula noong 2012, kung saan nakapagsulat na umano siya ng libo-libong ponencia at hiwalay na opinyon.
Ayon kay Robredo, ipinakita rin ni Leonen ang kanyang kakayahang humawak ng mahihirap na usapin bago pa man siya maitalaga sa Korte Suprema, kabilang ang pagbuo ng framework agreement sa Moro Islamic Liberation Front (MILF).
Binanggit din ng alkalde ang karanasan ni Leonen sa pamumuno sa hudikatura at ang kanyang pinag-aralan.
Personal din umanong nasaksihan ni Robredo ang mga pagsisikap ni Leonen upang matiyak ang wastong interpretasyon ng Konstitusyon at mga batas, gayundin ang pagsusulong ng social justice, human rights at institutional integrity.
“I have no doubt that he will work in a humble and collegial manner that will ensure the stability of our Judiciary and the full development of our country,” dagdag ni Robredo.
Kinumpirma naman ni Supreme Court Spokesperson Atty. Camille Ting na natanggap ng korte ang liham ni Robredo. (AC)
