Tinawag ni PPP party-list Rep. Harold Duterte na “political assassination” ang desisyon ng impeachment court na ibaba ang voting threshold sa impeachment trial sa kanyang pinsan na si Vice President Sara Duterte.
“Political convenience,” ayon sa mambabatas matapos ayunan ng 13 sa 24 senator-judges ang voting threshold.
Ginawa aniya ito ng 13 senator-judges kahit malinaw sa Saligang Batas na “two-thirds of all senators” at hindi “senators present.”
“The impeachment threshold is intentionally difficult precisely because it is a political process. More so with everything that is happening now,” ayon sa bagitong mambabatas na kabilang sa Duterte bloc sa Kamara.
Ipinaliwanag nito na hindi nagkataon na hinahanting ngayon si Sen. Ronald “Bato” dela Rosa dahil sa warrant of arrest na hindi pirmado aniya ng isang huwes sa Pilipinas at maging ang plunder cases nina Sens. Jinggoy Estrada at Rodante Marcolta at maging ang mga kasong kinakaharap ni Sen. Loren Legarda at magkapatid na sina Sens. Mark at Camille Villar.
“In the meantime, numerous majority senators were implicated in the flood control scandal, yet cases against them have slowed, or have all but disappeared,” ayon pa sa mambabatas.
“Tama na ang lokohan kasi wala nang naloloko. Hindi ito nagkataon, isa itong political assassination. We all took an oath to support and defend the Constitution, and I can only hope that this will prevail over politics,” dagdag pa nito. (Bernard Taguinod)
