Iginiit ni House prosecutor at Mamamayang Liberal party-list Rep. Leila de Lima na hindi nabago ang two-thirds voting requirement para ma-convict si Vice President Sara Duterte sa naging desisyon ng Senate impeachment court.
“Sa pasya ng Impeachment Court, hindi nagbago ang 2/3,” sabi ni De Lima sa isang social media post.
“Anuman ang pinal na numero, tuloy ang Prosecution sa paglalatag ng mga ebidensya para sa pananagutan at hustisya,” dagdag pa ng lady solon.
Nagpahayag din ng kaparehong pananaw si House Deputy Minority Leader at Akbayan party-list Rep. Perci Cendaña.
“Akbayan Rep. Chel Diokno said it best: 2/3 remains 2/3. The Constitutional Rule has not changed,” sabi ni Cendaña, na tinutukoy ang pahayag ng kanyang ka-party sa oral argument sa Senate impeachment court.
“Lowering the threshold is very much consistent with the Constitution’s principle of accountability. Hindi puwedeng bumoto ang mga nagtatago sa batas, ang mga nakakulong, at ang mga hindi naman nakilahok sa proseso,” dagdag pa ni Cendaña. “Accountability cannot be held hostage by absentee votes.”
Bumoto ang mga senador pabor sa pagbase sa two-thirds threshold sa bilang ng mga senador na lumalahok sa paglilitis. (Billy Begas)
