Ipina-subpoena ng House prosecution panel ang limang testigo na ipepresenta nito kaugnay ng umano’y maling paggamit at iregularidad sa paggastos ni Vice President Sara Duterte sa confidential funds nito.
Kabilang sa mga ipinatawag ng prosekusyon sina dating Department of Education (DepEd) special disbursing officer (SDO) Edward Fajarda at ang kanyang asawa na si DepEd Assistant Secretary Sunshine Charry Fajarda, Philippine Statistics Authority (PSA) Assistant National Statistician Marizza Grande, Police Maj. Jovelyn Magay, at Bresilio Sabaldan ng Commission on Audit (COA).
Iniutos ng Senate impeachment court na dumalo ang mga ito sa pagdinig sa Setyembre 7, 8, at 9.
Ayon sa lead prosecutor na si Batangas Rep. Gerville Luistro, sina Magay at Sabaldan ay mga karagdagang saksi na saklaw ng reservation ng prosecution sa pretrial brief nito, na isinama ng Senate impeachment court sa pretrial order nito.
Sinabi niya na ilalahad ng prosecution ang partikular na layunin ng kanilang testimonya kapag iniharap na sila.
Kinuwestiyon naman ni lead defense counsel Shiela Sison ang pagsasama kina Magay at Sabaldan, at sinabing hindi niya nakita ang kanilang mga pangalan sa mga saksi na partikular na tinukoy ng prosecution noong pretrial.
Sinabi ng korte na maaaring bigyan ang depensa ng karagdagang oras upang maghanda para sa cross-examination kung kakailanganin.
Sinusuri rin ng prosecution ang posibilidad na hindi na ituloy ang testimonya ni Edward Fajarda dahil sa kanyang kondisyon sa kalusugan.
“Concerning, Your Honor, witness Mr. Edward D. Fajarda, we would like to manifest that we completely understand, and in fact sympathize, and express our concern on his medical condition,” sabi ni Luistro.
“It is our intention not to aggravate his condition. As a matter of fact, it is likewise our intention to excuse him, if possible, from the rigors of being presented in the witness stand,” dagdag pa nito. “However, Your Honor, that is without sacrificing the case of the prosecution.”
Sinabi ni Luistro na tinitignan ng prosekusyon ang posibilidad ng stipulation kasama ang depensa upang hindi na kailanganing humarap ni Fajarda sa korte. Si Fajarda ay nagpapagaling matapos ma-stroke.
Si Fajarda ang special disbursing officer (SDO) ni Duterte sa DepEd. (Billy Begas)
