Hindi tuluyang isinasara ni Gilas Pilipinas head coach Tim Cone ang posibilidad na muling maglaro para sa national team si June Mar Fajardo, kahit pormal nang nagretiro ang nine-time PBA MVP sa Gilas.
Ayon kay Cone, si Fajardo mismo ang nagdesisyong umalis sa national team, ngunit hindi niya inaalis ang posibilidad na kailanganin itong muli ng Gilas sa hinaharap.
“I’m not ruling out June Mar. June Mar is ruling out himself, but I’m not ruling out June Mar,” ani Cone sa panayam sa programang “The Scorecard” ng Bilyonaryo News Channel.
Sinabi ni Cone na mahirap hulaan ang magiging sitwasyon ng Gilas dahil maaaring magkaroon ng injuries o iba pang hindi inaasahang pangyayari sa international basketball.
“I just don’t know what’s going to happen. You’ve got injuries that happen,” dagdag niya, habang binanggit ang mga naging injury nina Quentin Millora-Brown at Kai Sotto na nakaapekto sa kanilang availability para sa national team.
Matatandaang inanunsyo ni Fajardo ang kanyang pagreretiro sa Gilas matapos ang 13 taon bilang bahagi ng national team.
Panoorin ang buong panayam kay Cone sa August 31 episode ng “The Scorecard”.
Maaari namang abangan ang programa tuwing Lunes hanggang Biyernes, 10:00 ng gabi, sa Free TV Ch. 31, Cignal Ch. 24, Samsung TV Plus, TCL Smart TVs, Blast TV, AmasianTV, Cignal Play, BNC YouTube at Facebook. (AM)
