Proteksyon sa mga security guard itinulak ni Rep. Paolo Duterte
Itinulak ni Davao City Rep. Paolo Duterte ang panukala upang mapabuti at maproteksyunan ang mga security guard at iba pang miyembro ng private security industry.
Inihain nina Duterte at Benguet Rep. Eric Yap ang panukalang Magna Carta for Security Guards and Other Private Security Personnel (House Bill 5493).
Sa ilalim ng panukala, hindi maaaring bigyan ang mga guwardiya at iba pang empleyado sa private security industry ng sahod na mas mababa sa minimum wage at mga benepisyo na ibinigay sa mga empleyado sa ibang sektor gaya ng overtime pay, social security, 13th month pay, at retirement benefits.
“While they put their lives on the line for the protection of establishments and of the general public, these security personnel are deprived of the same protection from their employers in terms of salary and benefits,” sabi ng mga mambabatas sa panukala.
Ang paglilipat ng guwardya ay hindi maaaring magresulta sa pagbaba ng sahod nito.
Ayon kay Duterte ang naging desisyon ng Department of Labor and Employment (DOLE) sa kaso ng 12 guwardya sa Davao Oriental na hindi nabigyan ng sapat na bayad at benepisyo ay patunay na kailangang isabatas ang panukala.
“This is unacceptable considering that security guards and other private security personnel are exposed to risks that could endanger their lives. They are even considered as ‘force multipliers’ in places with limited police presence. They deserve to be treated better,” sabi ni Duterte.
Sa ilalim ng panukala dapat tiyakin ng employer na ligtas at maayos ang kondisyon ng mga guwardya na dapat magkaroon ng sapat na oras ng pahinga.
Ipagbabawal din ng panukala ang diskriminasyon sa mga guwardya dahil sa kasarian, civil status, relihiyon, paniniwalang politikal, at mga katulad nito.
Ang mga lalabag ay pagmumultahin ng P250,000 hanggang P500,000 at/o kulong na hanggang dalawang taon. (Billy Begas)
